Arlunwyr sarn artists

GWEITHDU

Gweithdu Sarn y Plas

Yn ddiweddar ar 30ain Ebrill 2025, aethom yn ôl i Sarn y Plas am y bore i fraslunio ac i beintio. Diolch i’r Ymddiriedolaeth, cawsom gyfle i i ymweld â thu mewn y bwthyn a chafwyd cefnogaeth staff Plas yn Rhiw. Cymerwyd llawer o luniau camera yn ogystal a brasluniau i’n hatgoffa o ddiwrnod poet yn yr haul. Diwrnod anhygoel arall i’w gofio.

Gweithdu ‘Yn y Dechreuad …'

Ar ddechrau mis Mawrth, cynhaliwyd wythnos o weithgareddau Cristnogol yng Nghapel y Drindod Pwllheli gan gynnwys arddangosfa gelf dan ofal Lois Adams ar y thema ‘Yn y Dechreuad …’ Penderfynwyd ein bod fel grwp am greu darn o waith celf ar gyfer yr arddangosfa yn dilyn gweithdy ysgythru pwynt sych a drefnwyd gan Hafwen Dorkins. Aethom ati i greu darluniau syml o saith niwrnod y creu, yna ysgythru y llinellau ar daflenni plexiglas cyn taenu haen o inc dros y lluniau a’u gwasgu drwy’r wasg argraffu. Wedi i’r gwaith inc sychu gorffenwyd trwy ddefnyddio dyfrlliw neu bastelau. Gosodwyd y cyfan ar gynfas du ac ysgrifennu adnodau o amgylch o llyfr Genesis o amgylch y lluniau gyda pin lliw aur. Roedd yr arddangosfa yn hynod ddiddorol gyda gwaith arlunwyr lleol a chenedlaethol a rhai o ysgolion Llŷn hefyd wedi creu gwaith cofiadwy iawn.

Gweithdu Jane Fellows

Ymaelododd Jane Fellows gyda’n grwp ym mis Medi 2024. Cytunodd i gynnal gweithdy gyda’n haelodau yn ddiweddar a dyma grynodeb o’r gweithdy cyffrous, hwyliog a llwyddianus iawn. Title y gweithdy oedd ‘Morluniau mewn pastelau meddal, Gesso ac inc acrylig’. Bydd Jane yn defnyddio papur pastel arbennig Uart 500, megis papur tywodlyd, a llun camera o’r Eifl o Borthdinllaen. Yn gyntaf, taenwyd haen o Gesso gyda chyllell baled ar y papur a darnau o gerdyn wedi eu rhwygo i greu gweadau i gynrychioli’r mynyddoedd, creigiau a’r gwellt. Mae Gesso yn gymysgedd o sialc a hylif a ddefnyddiwyd ers canrifoedd i baratoi cynfasau ar gyfer eu peintio. Rhaid oedd sychu’r Gesso gyda sychwr gwallt cyn symud ymlaen i’r cam nesaf. Yr ail gam oedd cymysgu inc acrylig gyda dŵr a’i baentio ar y Gesso. Mae’r inc yn creu patrymau diddorol wrth iddi suddo i mewn i’r craciau ar wyneb gweadlyd y Gesso. Y cam nesaf oedd peintio’r awyr gyda phastelau meddal ac yna cymysgu’r lliwiau i’w gilydd gyda’r bysedd. Defnyddir yr un arddull gyda’r môr, y tir a’r gwellt gan gyflwyno lliwiau newydd a fydd yn creu harmoni â’i gilydd. Y cam olaf oedd llusgo pastelau meddal ar draws wyneb y Gesso i ddiffinio gwead y creigiau a’r gwellt oedd cyn arddangos y gwaith gorffenedig.

Gweithdu Sarn y Plas

Ar 15ed Hydref 2024, gwahoddwyd ein grwp i ddigwyddiad diwedd tymor am waith Elsie Eldridge i glywed am a gweld ei darluniau bendigedig. Cafwyd cyfle hefyd i ddathlu llyfr gorffenedig ‘I Chwilio’ a ddarluniwyd gan blant Ysgol Crud y Werin mewn cydweithrediad ag Anni Llŷn a Tess Urbanska. Roedd plant yr ysgol yno hefyd.

Digwyddiadau yn Sarn y Plas, Rhiw, Penrhyn Llŷn Mai 2024 - Mai 2025. Cartref Elsie Eldridge yr arlunydd a’i gwr RS Thomas y bardd.

Trefnodd Yr Ymddiriedolaeth Genedlaethol ychydig o weithgareddau ar gyfer y gymuned lleol, y cyntaf a gynhaliwyd ar 23ain Mai 2024. Cymerodd nifer o’n haelodau ran mewn gweithgaredd awyr agored o dan arweiniad Kim Atkinson, arlunydd ac argraffydd lleol. Cafwyd defnyddiau, te, coffi a bisgedi. Cafwyd diwrnod cyffrous o beintio grwp yn y bore gan ddefnyddio cyfryngau cymysg a phaled o liwiau cyfyngiedig - peintio dail mawr o’r safle. Roedd unigolion wedyn yn peintio’r ddeilen o’u blaenau cyn symud ymlaen i’r ddeilen nesaf am ddau funud hyd nes roedd pawb wedi mynd o amgylch y bwrdd. Dyma ichi samplau o’r gwaith. Yn y prynhawn, buom yn braslunio a pheintio yn haul cynnes y Gwanwyn a chafwyd diwrnod da gan bawb.

Gweithdu Sue Walls

Yn ystod mis Mawrth, cawsom weithdy ardderchog gyda Su Walls, arlunydd ac argraffydd o Bwllheli. Cyflwynodd hi blatiau papur pwynt sych ar gyfer argraffu i aelodau ein grwp. Yn y gorffennol, cawsom hwyl mewn gweithdy colagraff gyda Su, lle bu rhaid torri allan darnau o blat mowntio a'i selio â polish botymau cyn argraffu'r llun gyda gwasg argraffu. Mae defnyddio platiau papur pwynt sych yn broses llawer cyflymach. Torrir arwynebedd y papur gyda chyllell grefft finiog ac yna incio ac argraffu gyda'r wasg argraffu'n syth.

Gweithdy cyllell balet gyda Steve Pablo

Cawsom ddechrau da i'r flwyddyn gyda gweithdy cynhyrchiol a phleserus gan arlunydd Cymreig, Steve Pablo. Gan ddefnyddio ei dechneg bersonol ei hun yn ei ddarluniau, mi wnaeth Steve ein harwain drwy'r broses o ddefnyddio cyllell balet i beintio. Roedd hwn yn yn gyfle gwych i'n haelodau i arbrofi ac i weithio'n mwy hyderus a beiddgar! Roedd Steve yn barod iawn i sgwrsio gydag unigolion yn ein plith, i roi adborth a chyngor pan fo angen. Er nad oedd y dechneg o beintio at ddant pawb, roedd yn sesiwn diddorol ac yn brofiad addysgu gwerth chweil i'n haelodau.

Gweithdai blynyddoedd blaenorol